Kambódía: Leysið baráttukonuna Tep Vanny tafarlaust úr haldi

Tep Vanny er tákngervingur fyrir friðsamt aðgerðastarf í Kambódíu. Hún situr nú í fangelsi vegna staðfestu sinnar við að verja réttindi annarra.

Tep Vanny berst fyrir réttinum til húsaskjóls en síðustu tíu árin hefur hún barist fyrir réttindum samfélags síns í Phnom Penh þar sem þúsundir fjölskyldna hafa sætt þvinguðum brottflutningi af heimilum sínum. Ásamt fjölda annarra aðgerðasinna sem flestar eru konur hefur Tep Vanny sætt ofsóknum af hálfu stjórnvalda. Hún hefur verið handtekin, fangelsuð, áreitt og barin.

Stjórnvöld í Kambódíu eru staðráðin í að þagga niður í baráttufólki eins og Tep Vanny og sýna aðgerðasinnum eins og henni hvað kann að henda ef það berst fyrir réttindum sínum og annarra.

Þrátt fyrir þær miklu áskoranir sem Tep Vanny stendur frammi fyrir hefur hún haldið í staðfestu sinni og óþreytandi baráttu fyrir réttlæti.

Vanny hefur sýnt einstakt hugrekki andspænis miklu mótlæti. Sýndu henni að hún er ekki ein í baráttunni. Hver undirskrift skiptir máli í þessari baráttu.

Skoraðu á stjórnvöld í Kambódíu að stöðva herferð sína gegn baráttufólki fyrir mannréttindum og leysa Tep Vanny tafarlaust og án skilyrða úr haldi, ásamt því að fella niður allar ákærur á hendur henni.

Við munum safna undirskriftum ykkar saman, senda þær á forsætisráðherra Kambódíu og krefja hann um að leysa Tep Vanny skilyrðislaust úr haldi. 


Láttu það berast